Nagaland MLA te party thlak thubuai SC-in ngaihtuah dawn

Nagaland-a Nationalist Congress Party (NCP) MLA pathumin nikum June 16-a party chhuahsana BJP an zawm avanga Central-a NCP party thuneitute'n thubuai an siamsak chu Supreme Court-in vawiinah a ngaihtuah ang.

NCP MLA BJP zawmtute hi Imtilemba Sangtam, Dr T. M. Lotha leh Mmhonlumo Kikon te an ni.

MLA te thubuai hi Supreme Court-a Justice J. Chelameswar leh Justice Rohinton Fali Nariman te chuan an ngaihtuah dawn a, Advocate Amit Kumar chu NCP aiawha dingin, Advocate Mohinder Jit Singh-a'n MLA te ai a awh ang.

MLA pathumte'n nikuma BJP an zawm hnuah Nagaland NCP chuan India danpui, Tenth Schedule tlawhchhanin assembly speaker Chotisuh Sazo hnenah complaint an siam a, speaker chuan MLA te hi an nihna a hlihsak a ni. MLA te hian speaker thuchhuak hi Gauhati High Court-ah an khing leh a, Gauhati HC chuan speaker thuchhuak chu hnawlin MLA te'n BJP an zawmna a pawmsak a ni.

NCP chuan MLA te chunga Gauhati HC thuchhuak hi Supreme Court-ah Special Leave Petition(SLP) thehlutin an khing leh a, he thubuai hi vawiinah SC-in a ngaihtuah dawn a ni.