Sorkar laipuiin Tuli Paper Mill dinthar nan vbch 489 a ruahman

Sorkar laipui chuan Nagaland-a lehkha siamna, Nagaland Pulp and Paper Corporation Ltd (NPPCL) dinthar nan cheng vaibelchhe 489 a ruahman.

NPPCL hi Tuli Paper Mill tia hriat a ni.

Thawhlehnia NPPCL hmunpui tlawhtu, Union Minister for Heavy Industries and Public Enterprise Anand G Geete chuan he thu hi sawiin lehkha siamna hmunpui dinthar lehna hi thawh hniha kalpui a ni ang, a ti a, a thawh hnihna kal­pui nan vaibelchhe 190 dahbelh a nih tur thu a sawi bawk.

Union Minister Geete chuan paper mill dinthar thawh khatna hi nakkum November thlaa zawhfel hman an tum thu a sawi a, sorkar laipuiin senso 95% a tum tur thu leh state sorkarin 5% a tum tur thu a sawi bawk. Paper mill dinthar thawh khatnaa state sorkar sum tum tur 5% hi cheng vaibelchhe 23 vel a ni.

Union Minister chuan paper mill dinthar dan ruahmanna siam turin March thla hian New Delhi-ah state sorkar official te nen meeting neih a nih tur thu a sawi bawk a, NPPCL dinthar leh nan state sorkar chu theih­tawp chhuaha sorkar laipui thawhpui turin a sawm nghal bawk.

Paper mill-a hna­thawk tur chhawr dan chungchang sawiin Geete chuan hnathawktu mi 600 lak thuai an tum thu an sawi a, a bak mi 750 chu a ṭul dan zela lak an nih tur thu a sawi.