Tripura-ah IPFT ten State pek phutin kawngpui an dang

Indigenous People’s Front of Tripura (IPFT) te chuan Nilaini aṭang khan state hran pek phutin Tripura state huam chhungah rel leh motor kawngpui te an dang.

IPFT te hian state hran pek phut hian vawi eng emaw zat lungawi lohna an lantir tawh a, an thil phut te a hlawhtlin theih nan kawng dan hi an kalpui leh a ni. Buaina lian zawk a chhuah loh nan Tripura state Rifles leh central paramilitary forces te chuan venhim hna an thawk nghal tih Inspector General of Police (Law and Order) Anurag chuan a sawi.

Tribal Areas Autonomous District Council (TTAADC) chu Sixth Schedule of the Constitution in 1985 hnuaiah din a lo ni tawh a ni. IPFT President Narandra Chandra Debbarma chuan, TTAADC chu a hming mai a nih thu sawiin, thuneihna tak tak pek an ni lo niin a sawi. Inkalpawhna pawimawh National Highway No.8 leh railway line te chu dan a nih avang hian harsatna a thleng mek a ni. Kawng dannaah hian mipui 10,000 vel an pung khawm a, an thil phut te an au chhuahpui a ni. West Tripura district police chief Abhijit Saptarshi chuan, kawngpui dan a nih vang hian buaina lian tham chhuak a awm lo tih a sawi a, venhimna khauh taka kalpui a ni a, State Rifles leh central para-military forces te hnathawh a fakawm hle tih a sawi bawk.

IPFT te chuan Tribal Areas Autonomous District Council (TTAADC) chu state-ah hlankai an phut tih sawiin, tribal area chu sorkarin a ngaihthah hle a, hmasawnna hmuh tur a awm meuh lo a ni an ti. Union Home Ministry-ah vawi eng emaw zat memorandum an thehlut tawh tih an sawi bawk. IPFT te state hran pek hi Congress, Bharatiya Janata Party (BJP) leh paty dang te chuan an dodal a ni. CPM central committee member Gautam Daschuan, "India rama state te berte zinga mi Tripura chu ṭhendarh theih a ni lo" a lo ti ve mek bawk. Chief Minister Manik Sarkar pawhin, Indigenous People’s Front of Tripura te thil phut chu awm lo a tih thu sawiin, state ṭhendarh tumna reng reng chu dodal zel a nih tur thu a sawi.

Tribal Areas Autonomous District Council huam chin hi sq. km 10,491.69 niin, mi hring nuai 12.16 zet an cheng a, 90% te chu tribal an ni.