Sapeltute dan theih an ni lo : Assam Forest Minister

Kaziranga National Park-a Samak kah chuan chanchin a nei chho zel a, inthlan hmain party lian pahnih Bharatiya Janata Party (BJP) leh Congress te chuan nasa takin inbeih nana an lo hmang tawh.

Tunhnai khan Assam Forest Minister Pramila Rani Brahma chuan Kaziranga National Park hi ṭum thum lai tlawhin, venhimna chak zawka kalpui turin hma a la. A hmalakna tur zingah hian sapeltute nena inzawmna neia puh Park director chu suspend a ni a, a hnu lawkah sapeltu ten Samak an kap leh tih hriat a ni bawk. Hei hian sawizui a hlawh hle a, mi ṭhenkhat chuan inthlan hmaa a lo intiam tawh anga hma la tawk loah BJP sorkar chu an puh. Forest minister Pramila Rani Brahma chuan sapeltute hi dan an harsat tur thu a lo sawi tawh a ni. Rani chuan, "State sorkar chuan theihtawp chhhuahin sapeltute laka ramsa te hum tur hian a bei mek a, a zavaia titawp vek tur chuan thil theih a ni lo. Inzawmna thuk tak a awm avangin he mi chhu chat tur hi chuan a la harsa rih a ni, nimahsela veng tur chuan theihtawp kan chhuah zel ang" a ti. Kum 2016 chhung ringawt pawhin Samak 10 thah an ni leh tawh. June 7 khan minister hian park hi a tlawh a, venhimna hnathawktute chu heng sapeltute do let tur hian an ṭha tawk lo tih sawiin, a thlak dan kawng dap a nih tur thu a lo sawi tawh bawk.

Samak ki hi China leh Southeast Asia-ah te hralh ṭhin a ni a, pakhat hi cheng vaibelchhe khat man vela chhut a ni.