Indo-Bangla Transit Protocol hman tan a ni

India sorkar leh Bangladesh ten inremna an lo siam tawh angin, tonne1005 zeta rit thir phur lawng chuan Bangladesh aṭangin Tripura a thleng ta. He inremna ‘Inland Water Transit and Trade Protocol’ hi nikum June khan Prime Minister Narendra Modi'n Dhaka a tlawh ṭumin ziah a ni.

Custom official chuan, Bangladesh lawng hian thir hi Kolkata aṭanga phur chhuakin Bangladesh-a Ashuganj river port a thlenpui a, heta ṭang hian truck hmangin Ashuganj port aṭang hian Tripura-ah phurh luh leh a ni. Agartala hi India leh ṭhenawm ram Bangladesh te insumdawn tawna pawimawh tak niin, West Bengal-a Benapole-Petrapole land port chu a lian ber a ni thung. Kolkata-Ashuganj-Tripura route hi km 500 niin, Kolkata-Agartala via Siliguri, Assam leh Meghalaya km 1,600 aiin a tawi zawk fe a ni. Inland Water Transit and Trade Protocol inremna hmang hian India leh Bangladesh te chuan ram pahnih te ram pal tlangin ramdangah bungrua an thawn chhuak thei bawk. Bangladesh chuan Nepal leh Bhutan-ah te bungrua thawn turin India ram a paltlang thei a, hetiang bawk hian India chuan Bangladeh kaltlangin Myanmar-ah sumdawnna a kalpui thei a ni.