Rijiju-a'n Bezbaruah committee report a ennawn
Union Ministry of Home Affairs (MHA) chuan Ningani khan Union Ministry dangte nen hmarchhak mite chungchangah inter-ministerial meeting neiin, Minister of State for Home Affairs, Kiren Rijiju-a'n a kaihruai.
Meeting-ah hian DoNER, HRD Ministry, Culture, I&B leh Sports & Youth Affairs Ministry aihawte bakah Delhi Police aiawhte leh Delhi-a hmarchhak state pariat Resident Commissioner te an tel.
Bezbaruah Committee report ennawnnaah Rijiju chuan DoNER secretary, R. Vijaykumar chu hmarchhak mite venhimna atana budget aṭanga a hrana sum ruahman tura rawtna siam turin a hriattir.
Union Minister Rijiju chuan hmarchhak mite tana Delhi-a hostel siam turah DoNER Ministry chu Urban Development Ministry thawhpui turin a hriattir bawk.
"Meeting-ah hian hmarchhak zirlaite tana Delhi-a hostel siam tur chungchang pawh sawi ho a ni a, JNU leh Ramanujan College-a hostel sak tur chu bawhzui mek a ni. Delhi University hnuaia Hindu, Khalsa leh Dayal Singh College-ah te pawh hostel hmun tur enfiah tawh a ni bawk," tiin official thuchhuahin a tarlang.
Zirlaibua hmarchhak mite chanchin telh tur chungchang pawh sawi ho a ni bawk a, Rijiju chuan pawl 6 aṭanga 12 inkar CBSE course zirlaibua National Council of Educational Research and Training (NCERT)-in hmarchhak history, geography leh culture chanchin telh tuma hmalak a ṭan chu lawmawm a tih thu a sawi.
Union Minister Rijiju chuan zirlai bua hmarchhak mite chungchang telh turah Human Resource Development (HRD) Ministry official te chu hmarchhak state education board te lehkhabu buatsaih zirchiang turin a hriattir bawk.
Delhi Police-a hnaruak hnawhkhah chungchangah Rijiju chuan Delhi police atana hmarchhak mite lak chu bawhzui zel a ni, a ti. Delhi Police official chuan hemi chungchang hi sawiin, Delhi police lakna atana tehna hrang hrang awmte chu hmarchhak mite thlahdul tura ruahmanna kalpui mek a ni, a ti.
University Grants Commission (UGC) official te chuan hmarchhak zirlai 10,000 hnenah fellowship pek an ni tih Union Minister an hrilh bakah hmarchhak biala university-te hmasawnna atana an hmachhawp hrang hrang an tarlang bawk.
Sports Ministry official te chuan Manipur-a sport facilities tihchangtlun nan vaibelchhe 100 ruahman a ni, tih an tarlang a, March thlaa vaibelchhe 25 pekchhuah a nih tur thu an tarlang bawk.
Manipur-a National Sports University dinnna tur draft bill pawh peihfel tawh a ni a, a hmun atan state sorkar chuan Thoubal district-ah ram a peihfel tawh bawk. Sport university hi academic session 2015-16 aṭanga ṭan hman tum a ni.
Rijiju chuan hmarchhak bial tana ministry hrang hrang te hmalakna chu a bua siamin, hmarchhak state sorkar zawng zawng leh media-te hnenah pek an nih tur thu a sawi bawk.