Minister-in pianphunga rualbanlote hamṭhatna tur scheme a puang

Union Minister for Social Justice and Empowerment Thaawar Chand Gehlot chuan Ni­ngani khan hmarchhak biala rualbanlote hamṭhat nan cheng vaibelchhe 22 senna tur scheme kalpui a nih tur thu a sawi.

"India ram hmasawn nan hmarchhak bial ngaihpawimawh a ṭul a, hmarchhak chu India bân (arm) ṭhenhran theih loh a ni. Piangphunga rualbanlote hamṭhatna scheme kalpui tumin hma kan la mek a ni," tiin Gehlot chuan a sawi.

Hmarchhak state zawng zawnga rualbanlote tan vaibelchhe 22 senna tur scheme hrang hrang Social Justice and Empowerment Ministry chuan a buaipui mek a ni, a ti.

"Rualbanlote chhawm­­dawlna in, Composite Regional Centres (CRC) leh rehabilitation unit eng emaw zat awm mah se tihchantlun ngai an ni a, mi tam zawk awm theih nan tihlen ngai a ni bawk. Building zauh nan vaibelchhe 3.5 kan dah bawk a ni," a ti.

Union Minister Gehlot chuan naupang kum nga hnuailam beng hriatna ṭhalo mi 100 te tan 'cochlear device' vuahna tur vaibelchhe 6 pekchhuah a nih tur thu a sawi bawk.

"Ka ministry chuan disability study centre hawnna atan cheng vaibelchhe 7 Mizoram a pe dawn bawk a, Guwahati CRC chu nuai 75.43 pek a ni bawk ang. Kum 2015-16 chhungin Rehabilitation Council of India (RCI) hnenah vaibelchhe khat pek a ni bawk ang," tiin a sawi bawk.

Rualbanlote bungraw hman dahkhawm nan Guwahati-ah cheng vaibel­chhe hnih sengin ware­house sak tum a ni bawk.

Gehlot hian Ningani khan hmarchhak state Social Welfare Minister-te Guwahati-ah meeting a neihpui a, sorkar laipui chuan pianphunga rualbanlote tana sorkar hnaa reservation a siamsakah rualbanloh tehnaa 40% an hman chu 15-20 per cent-a tihhniam a tum thu a sawi.

Meeting-ah hian Assam Chief Minister Tarun Gogoi chuan rualbanlote chhawmdawlna in tam zawk an mamawh thu a sawi bawk a, Union Minister Gehlot chuan theihtawp chhuaha ṭanpui a tiam.