AP MLA ten hmasawnna hnathawh mek sawiho

Arunachal Pradesh-a political party hrang hrang MLA te chuan an state-a hmasawnna hnathawh te sawihona hun Thawhlehni khan Itanagar-ah an nei.

He hunah hian People’s Party of Arunachal (PPA), Bharatiya Janata Party (BJP) leh Independents (Ind) MLA te an tel a ni. Chief Minister Kalikho Pul bakah MLA dang te an tel ṭha hle a ni. Pul chuan meeting buatsaih a nih chhan sawiin, state tana hmasawnna hna thawh te hi dik taka kalpui a ṭul a ni a ti a, hmasawnna hna thawh kawngah party inthliarna awm lo se a duh thu a sawi. State hmasawn ni tur hian party hrang hrang te chu kan thawhho ṭhat a ngai a ni a ti a, an hnathawh tawh te leh hmachhawp awm mek te a tarlan bakah New Delhi, Mumbai, Shillong leh Guwahati-ah te House sak a ni a ti.

He meeting-ah hian Disaster leh Relief Fund chungchang te sawi a ni a, tuilian leh ruahsur avanga chhiatna tuartute chu DONER Ministry aṭanga chhawmdawlna pek an nih tur thu leh NEC aṭanga ṭanpuina beisei a nih thu tarlan a ni. Arunachal Pradesh hian tuilian leh leimin nasa tak a tuar a, chhungkaw eng emaw zat chuan an chenna an chhuahsan hial a ni. Heng baka hian power tam zawk thar chhuah a nih theih nana hmalak dan tur an sawiho. Arunachal hi India ram state zinga power thar chhuak tam thei ber ni turin a dinhmun a ṭha hle a, project 140 kalpui mek niin, heng te hi zawh fel a nih hunah chuan Prime minister Narendra Modi-an India chu power-a intodelh ram ni tura a lo suangtuah ṭhin te chu tihhlawhtlin beisei a nih thu Chief Minister chuan a lo sawi tawh bawk a ni.

Party aiawh te chuan hmasawnna hna thawh mek an duh khawp loh lai leh ṭan lak ngaihna laite an sawi ve bawk.