Assam sorkar-in KNP venhimna ṭha zawk pe dawn

Kaziranga National Park-a Samak te chu thah an nih fo hnuah, Assam Chief Minister Sarbananda Sonowal, deputy commissioner leh superintendents of police te chuan Nilaini khan venhimna ṭha zawk kalpui dan tur an sawi.

Park hnaiha awm Jor-hat, Golaghat leh Na-gaon district te chu Kaziranga National Park venhimna kawngah hian Sonowal chuan chhawr ṭangkai an ṭul thu a sawi. KNP chu World Heritage te zinga mi a nih avangin state sorkar chuan a ngai pawimawh hle tih a ni a ti a. Heng Samak te hi sapeltute lakah an him theih nan international expert rawn an nih tur thu chief minister Sonowal chuan a sawi. KNP chu Assam mai ni lo India rohlu a ni a ti a, venhimna ṭha zawk a awm theih nan a ṭul ang te sorkar chuan a bawhzui zel ang a ti.

Assam election neih dawn khan BJP chuan KNP venhimna ṭha zawk pe turin hmalak a nih tur thu an lo sawi tawh a ni. Tunah hian state sorkar chuan park enkawltu eng emaw zat chu a sawn chhuak tawh a, venhimna hna thawktu ṭha zawk dah tumin hma a la mek a ni. KNP-a thawk tur hian officer pali - assistant conservator of forest (ACF), forest ranger leh deputy conservator of forest pahnih a la thar a ni. Assam-a BJP-a sorkar hnu thla khat chhung khan Kaziranga National Park-ah hian sapeltute chuan Samak pathum an kap hman a ni.