Meghalaya-in National Games 2022 thlen tum

Meghalaya sorkar chuan Meghalaya State Olympic Association (MSOA) chu National Games 2022 thleng tura hma la turin a ngen.

Thawhlehni khan Shillong-a State Con-vention Centre-ah meeting neih a ni a, he hun hi Chief Minister Dr. Mukul Sangma, opposition leader Dr. Donkupar Roy, deputy chief minister Rowell Lyngdoh, sports & youth affairs minister Zenith Sangma, MP Vincent Pala, parliamentary secretaries, KHADC MDC leh MSOA member ṭhahnem tak an tel a ni.

Chief Minister chuan state sorkar aiawhin MSOA hnenah hian an hmalakna atan nuai 50 cheque a hlan. Mukul Sangma chuan, National Games 2022 thleng tur hian kawng dap mek a ni a, he hun hi State kum 50-na tur chiah a nih dawn bawk avangin thleng ngei turin hma kan la dawn a ni a ti. Infrastructure lamah nasa taka hmalak a ngai dawn tih state sorkar chuan a hria a, chu chuan kawng tam taka hmasawnna a thlen ka beisei a ni a ti. Opposition leader Dr. Donkupar Roy pawhin, National Games chuan nasa takin infiam mite a cho phur a rin thu sawiin, state tan hmasawnna tam tak a thlen a rin thu a sawi ve bawk. Sports & Youth Affairs Minister Zenith Sangma chuan, South Asian Games, 2016 thlen tuma state sorkar inbuatsaihna chuan kawng tam takah hmasawnna a thlen tawh thu sawiin, National Games thleng tur pawh hian inbuatsaih a ṭul thu a sawi.

Hmarchhak state zingah Manipur chu National Games thleng hmasa ber niin, kum 1999 khan hlawhtling taka neih a lo ni tawh a, kum 2007 khan Assam chuan National Games hi a lo thleng ve tawh bawk.