Assam : APSC chairman hlui kum 14 tang turin hrem

Assam Public Service Commission (APSC) in kum 2014-a Agriculture Development Officer (ADO) a lak ṭuma a thil dik lo titu, APSC chairman hlui Rakesh Paul chu thiam loh chantir a nih hnuah nimin khan a hremna tur tih chhuah a ni a, kum 14 tang tura hrem niin Rs nuai 2 chawi tura tih a ni bawk.

APSC chairman hlui bakah hian ADO hna lak ṭuma thil dik lo tihnaa inhnamhnawih dang mi 31 te hremna pawh tihchhuah ve nghal niin, Basanta Kumar Doley leh Samedur Rahman te chu kum 10 chhung tang tura an chungthu rel a ni a, Rs 50,000 chawitir an ni bawk. A bak midang 29-te chu kum 4 lung-in tang tura tih niin Rs 10,000 chawitir an ni bawk.

Gauhati High Court chuan ADO hna laknaa thil dik lo titu mi 32-te hi kar liam ta Thawhṭanni khan thiam loh a chantir a, nimin khan hremna tur hi a puang chiang ta a ni.

ADO hna lakna tur hi kum 2013 khan tihchhuah a ni a, he hna laknaa tlingte hian APSC official te thamna an pe nia sawi a ni. Zirlai exam zinga a tling zo lo pakhat chuan RTI zawhna chhanna a dawn aṭangin mark pek danah thil fel lo a awm nia hriain complaint a thehlut a ni. ADO exam-a tling zinga ṭhenkhat chuan thamna an pek vangin mark an hmu hnem tiin, kum 2017 khan Prevention of Corruption Act hnuaiah thubuai ziah luh a ni. APSC member pali, ADO hna exam-tu zirlai 36 leh thamna pekna kaihhnawiha zirlai leh APSC member-te inkara palai hna thawktu mi pathum chu chhui an ni a, mi 32 thiam loh chantir niin midang 11 erawh thiam lohna finfiahna a awm lo tiin thubuai ngaihtuahtu Judge Thakuria chuan a chhuah zalen thung. APSC member Binita Rynjha chu thuhretuah a ṭang bawk a ni.

ADO exam mai bakah hian APSC chairman hlui Rakhes Paul leh member dangte bakah APSC official ṭhenkhat chu Combined Competitive Examinations (CCE) hna laknaah thamna laa puh an nih vangin man an lo ni tawh a ni. Assam Police hian hna lak dan kaihhnawiha thil fel lo a awm vangin kum 2016 hnu lamah mi 70 dawn an man tawh a, heng zingah hian APSC chairman hlui leh civil service official 57-te an tel.