Hmarchhaka ADC-te thil phut zirchiang turin committee din dawn

Sorkar laipuiin hmarchhak Autonomous District Council (ADC) 10-te thil ngiat zirchiang turin member pathum awmna committee din a ni dawn tih Bodoland Territorial Region (BTR) chief executive member, Pramod Boro chuan a sawi. He committee hi union minister of state (Home) Nityanand Rai chuan a kaihruai ang.

Hmarchhak biala ADC leh Territorial Council (TC) aiawhten kar liam ta Ningani khan union home minister Amit Shah hmuin an thil phut, 125th amendment bill chu tun budget session chhung ngeia pu lut turin an ngen a ni. He bill hi ADC leh TC-te direct funding, rights tam zawk (ram chungchanga thuneihna telin) leh thuneihna sang zawk pek tumna niin ADC lam chuan he bill pawm vat hi an duh a ni.

Union home minister hian mi pathum awmna committee din a nih tur thu hi a lo hrilh niin Pramad Boro chuan a sawi a, thla khat chhung chuan an zawh fel beisei a ni, a ti. "He thil hi kum 30-40 chhung kan lo ngiat tawh a ni" Boro chuan a ti bawk. CEM Boro chuan home minister in a lo dawnsawn danah council dang hotute pawh an hlim hle niin a sawi bawk.