Arunachal : Itanagar-ah ruihhlo ti ṭhinte man an ni

Itanagar police-te chuan mipui hnen aṭanga ngenna an dawn tam avangin vantlang nun tibuaitu leh mipuite harsatna thlen ṭhinte laka mipuite venhim nan ngawrh lehzualin patrolling an kalpui. Vantlang hmuna ruihhlo ti ṭhinte chu man niin an lakah thubuai ziah luh a ni.

Arunachal khawpui, Itanagar chhunga mipuite tlawh tam ṭhin hmunhma, a bikin IG Park leh hmun dangte chu uluk lehzuala vil an ni a, heng vantlang hmunte hi chhungkuaa tlawh ngam hmun a nih theih nan police-te chuan ṭan an la a ni. IG Park-ah hian zu rui leh buaina siam vangin mi 13 an man tawh. Heng mite hi Bharatiya Nagarik Suraksha Sanhita (BNSS) Section 126 hnuaiah man niin hetiang ching tawh lo tura zilh an ni bawk.

Itanagar police-te chuan vantlang hmunhmaah ruihhlo ti lo turin mipuite chu an chah a, heng hmunte hi mipui tlawh tlaka siam tumin ṭan an la zel dawn tih an tarlang.