Union Home Minister Rajnath Singh-an Manipur leh Tripura a tlawh

Union Home Minister Rajnath Singh chuan kar kalta Zirtawpni leh Inrinni khan Manipur leh Tripura a tlawh a, Union Minister of state for Home Affairs Kiren Rijiju-a'n a ṭawiawm.

Union Minister Singh hian February 13 khan Manipur leh Myanmar ramri khua, Moreh a tlawh nghal a, integrated checkpost leh immigration office sak mek a enfiah hnuah Assam Rifles official te leh para military force official te a kawm nghal bawk.

Moreh aṭangin Imphal-ah a let leh a, Manipur Chief Minister Ibobi Singh, chief secretary PC Lawmkunga, DGP Shahid Ahmad leh sorkar senior official te nen dan leh thupek dinhmun thlir­in meeting an nei bawk.

Minister Singh chuan Manipur leh Assam-a hel bangte telna sipai battalion hnih din a nih tur thu a sawi a, sipai battalion din tur hmangin helte chu an pawl bansan tura an thlem theih a beisei thu a sawi.

Moreh-a ramri hung hna chawlhsan chungchangah Union Minister chuan Myanmar leh India-in thawhhona ṭha an neih thu sawiin, inhmuhthiam lohna an neih loh thu leh, ramri hung­naa harsatna thlengte pawh chinfel thuai a nih tur thu a sawi.

Manipur leh Myanmar ramri hi kilometre 350 vela thui a ni a, Myanmar sipaite'n India ram an luah nia sawi a nih hnu leh Manipur-a tlawmngai pawlte'n an ram ṭhenkhat hung tel loh vanga an dodal hnuah kum 2004 khan Moreh-a ramri hung hna thawh mek chu chawlhsan lailawk a ni.

Singh chuan Inrinni khan Tripura a tlawh nghal a, Agartala state guest house-a chanchanthar thehdarhtute a kawmnaah sorkar laipui chuan hmarchhak bial hmasawnna a dah pawimawh thu a sawi a, tharum hmanga sorkar laka helna chu hmasawnna tiṭhuan­awptu a ni, a ti.

Minister chuan helte chu tharum thawhna bansan turin a ngen bawk.

"Tharum hmanga sorkar laka hel an awm chhung chuan hmasawnna a thleng tak tak thei lo ang. Sorkar laipuiin hmasawnna hna a thawh theihna atan helpawlte chu kum reilote chhung tal tharum thawhna chawlhsan rih turin ka ngen duh a ni," a ti.

Chanchinthar la­khawmtute'n Nagaland hel, NSCN(IM) leh Assam hel, ULFA te nena remna zawnga inbiakna an kalpui mek chungchanga zawhna an zawh chu Union Home Minister Singh chuan a chhang duh lo.

Union Home Minister chuan Inrinni vek khan Tripura hmar lam district, Kanchanpur-a Bru raltlante a tlawh nghal a, Bru raltlante chungchangah Chief Minister Manik Sarkar meeting a neihpui.

Agartala-a Tripura CM Sarkar nen meeting an neih hmain Singh hian Tripura hmarlama India-Bangladesh ramri, Khantlang Border Outpost a tlawh bawk a, Border Security Force (BSF) official te nen meeting a neihpui bawk.

BSF official te chuan Singh chu ramri boruak leh hel pawlte vanga harsatna thlengte an hriattir a, Singh chuan theihtawp chhuaha harsatna chinfel a tum thu a sawi.

"India ramri a him loh chuan kan zalenna pawh a derthawng a, hei vang hian ramri venghimtu BSF te hi kan chhuang hle a ni," tiin Singh chuan BSF te a fak.