Gogoi-a rawtna sorkar laipuiin a hnawl

State Disaster Relief Fund (SDRF) kaltlanga tuilian tuarte ṭanpuina atana sorkar laipui hnena ṭanpuina tihpunsak tura Assam Chief Minister Tarun Gogoi-a'n rawtna a thlen chu sorkar laipuiin a hnawl.

Chief Minister Gogoi chuan rawtna lehkha hi nikum September 24 khan Union Ministry of Home Affairs (MHA) hnenah a thawn a, SDRF kaltlanga tuilian tuarte ṭanpuina tihpunsak a rawt a, Assam-a tuilian tuar ṭhinte chenna-in chu mau râp-in a nih tlangpui avangin tuilian lakah an him lo hle a, ṭanpuina sum an dawnte chu a beitham lutuk a ni, a ti.

"Tuilian tuarte'n SRDF kal­tlanga ṭanpuina an dawnah an chenna-in chhia sak ṭhatna an dawn ngei ngei a ṭul a, hetih lai hian in sakna bungraw man a to tawh bawk si a, MHA-in ṭanpuina a bithliahsak chu a tlem lutuk a ni," tiin Gogoi chuan lehkha thawnah a tarlang.

Chief Minister Gogoi-a'n mau râp-in chhiate tana ṭanpuina pek a rawtah, luah tlak loha chhenna-in chhe vekte hnenah cheng 35,000 pek a rawt a, luah theiha mahse thawm ṭhat ngaite hnenah cheng 20,000 pek a rawt bawk. Mahse Gogoi-a rawtna hi MHA chuan a hnawl.

Gogoi-a rawtna chungchangah hian Union Minister of State for Home Affairs Kiren Rijiju chuan nikum December 29 khan thu­chhuah siamin, SDRF kaltlanga tuilian tuar, chenna-in chhiate ṭanpuina chu tihpun a nih tawh thu a tarlang a, luah tlak loha chenna-in pakhat chhe vek hnenah cheng 17,600 pek remtih a nih bakah chenna-in thawm ṭhat ngai pakhat zelah cheng 12,600 zel pek remtih a ni, a ti.