Paswan-a'n AFSPA chungchang Prime Minister sawipui a tum

Union Minister for Food, Public Distribution and Consumer Affairs Ram Vilas Paswan chuan kar kalta Inrinni khan Manipur a tlawh a, sipaite hnena thuneihna sang pekna dan, Armed Forces (Special Powers) Act, 1958 chungchang chu Prime Minister Narendra Modi sawipui a tum thu a sawi.

Paswan chuan AFSPA hlih phuta beitu Members of Parliament (MP) zing a mi a nih thu a sawi a, Parliament-ah vawi eng emaw zat a dinchhuahpui tawh thu a sawi bawk.

"PM Modi kaihhruaina hnuaiah tunah chuan sorkar laipui kalphung leh sukthlek a thlak danglam tawh a, Modi chuan hmarchhak chungchang hi a ngaihven nasa a, a hrechiang bawk a ni," a ti.

Union Minister Paswan chuan NDA sorkara cabinet minister a nihna angin hmar­chhak mite thliar hranna leh tihduhdahna chu dodal zel a tum thu a sawi bawk a, pawikhawihtute chu an phu tawk hremna pek an nih tur thu a sawi bawk.

Paswan chuan Food Security Act chu Manipur-ah a rang lama kalpui thuai a nih theih nan Manipur Chief Minister Ibobi Singh sawipui a tum thu a sawi bawk.

Hetihlai hian Lok Janasakti Party (LJP) hotu, Union Minister Paswan chuan Manipur-a rorellai Congress party thlawptu LJP MLA Karam Shyam chu LJP-in central-ah BJP an thlawp vangin eptu lama awm turin a ngen.

Central-a UPA sorkar laiin LJP chuan Congress party a lo thlawp tawh a, mahse nikum Lok Sabha inthlanah LJP chuan BJP a thawhpui leh thung.

Paswan chuan, "Tunah chuan Parliament-ah treasury bench lamah kan awm tawh a, Manipur-a LJP MLA awm­chhunin Congress sorkar a thlawp hi thil dik a ni lo," tiin a sawi.

Union Food and Consumer Affairs Minister Paswan chuan Food Security Act chungchangah Mizoram, Manipur, Nagaland leh Assam official te nen joint meeting an la neih tur thu a sawi bawk.