Railways-a hna lak chungchangah NFR insawifiah
Assam leh hmarchhak state danga media te'n Railways department hna laknaa hmarchhak ṭhalaite duhsak lo bik nia an tarlan chu Northeast Frontier Railway (NFR) chuan thuchhuah siama sawifiahin, an puhna chu thudik lo a ni tih a sawi.
NFR CPRO Sugato Lahiri chuan, "Railway Protection Force-a ancillary staff (RPF) leh Railway Protection Special Force (RPSF) lakna atana February 15-a written test neih turah hmarchhak ṭhalaite hnawl an ni tiin media-ah report hrang hrang a awm a, heng report te hi thu dik hriatchian loh vanga thleng a ni a, a dik lo a ni," a ti.
"RPF Chief Security Commissioner office-in a chhinchhiah danin India ram puma RPF leh RPSF ancillary staff 659 lak turah dilna thehluh hun tawp hmain hmarchhak mi 20,203-in an dil a, post ruak 659 zinga 68 chu hmarchhak bial huamchhung a mi a ni. Hmarchhak mi diltu 20,203 aṭangin mi 1,442 chu February 15-a written exam nei turin an tling a, exam tura hriattirna pawh pek tawh an ni," a ti.
Hna dil thei tura bithliah hriattirna chu kum 3013 December 6 khan chanchinbu lian zualahte chhuah a nih tawh thu Lahiri chuan a sawi bawk a, hemi chungchang hrechiang duh tan www.nfr.indianrailways.gov.in emaw RPF Recruitment Control Room, RPF Reserve Lines, Maligaon-a zawhfiah theih a nih thua tarlang.