Paswan-a'n FCI kudam Sakna tur lung a phum

Ni hnih thanga Manipur tlawhtu Union Minister of Food, Public Distribution and Consumer Affairs Ram Vilas Paswan chuan Pathianni khan Delhi-a a let hmain Imphal-a Food Corporation of India(FCI) kudam (godown) sakna tur lung a phum.

Assam, Manipur, Tripura leh Mizorama National Food Security Act (NFSA) kalpuina atana sorkar hmalak dante thlirhona meeting Imphal-a neihah Paswan chuan NFSA chu hmarchhak bialah June emaw July thlaah emaw kalpui ṭan a nih tur thu a sawi.

Paswan chuan NFSA kalpuina atana ration card computerisation kalpui mek chu Mizoram leh Tripura-ah 90% zawhfel tawh a ni, a ti a, Manipur-ah 77% leh Assam-in 62% an tihfel tawh thu a sawi bawk. Assam leh Tripura chuan NFSA hi June aṭangin kalpui ṭan an tum a, Manipur chuan July thlaa ṭan an tum thung.

Lumding leh Silchar inkara rel­kawng tihzau hna thawh vanga Manipur, Tripura, Mizoram leh Assam chhim lama rel hmanga buhfai thiarna chatlak mek chu March 31 hnuah hman chhunzawm theih a beisei thu a sawi bawk.

"Railways chuan rel lian tlan theihna atana Lumding leh Silchar inkara relkawng zauh hna an thawh mek chu March thla hian an peihfel hman a beisei a, hemi chhung hian kawng danga buhfai thiarna a khaihlak loh nan he lam thil buaipuitu official te chu theihtawp chhuah turin ka ngen tawh bawk," tiin Union Minister chuan a sawi.

FCI hian hmarchhak bial tan thla khatah buhfai metric ton 85,000 vel a pe ṭhin a, hnathawh avanga rel kawng khar a nih chhungin Myanmar aṭanga buhfai lalut turin ruahmanna a siam bawk.

Manipur, Tripura, Mizoram leh Assam chhim bialte hian thla khatah buhfai metric ton 82,744 an mamawh a, hetihlai hian FCI chuan heng bialah hian buhfai metric ton 1,26,443 chhekkhawlna neiin, tunah hian buhfai chhekkhawl sa metric ton 1,19,000 a nei.

Meeting-ah hian hmarchhak state tin aiawhte chuan Public Distribution System (PDS) hnuaia buhfai sem tur ni 70-90 daih an neih thu an tarlang bawk.

Union Food and Consumer Affairs minister Paswan chuan PDS hnuaia buhfai semnaa state tinte harsatna chu an hriatpui thu leh a chinfelna tam tak chu state sorkar kuta a innghah thu a sawi bawk a, Manipur Chief Minister O Ibobi leh Consumer Affairs, Food and Public Distribution minister M Okendro te chu May 31 hmaa Manipur-a NFSA kalpui ṭan turin a ngen bawk.