GTA hotuin tribal status chungchangah Sikkim Chief Minister hmuh a tum
Gorkhaland Territorial Administration (GTA) hotu Bimal Gurung chuan Gorkha te'n tribal status an phut chungchangah Sikkim Chief Minister Pawan Kumar Chamling hmuh a tum thu a sawi.
GTA hian an thil phut sorkar laipuia thlenpui turin state sorkar chu thawhpuia siam a tum a ni.
"State sorkar nen ṭangruala sorkar laipuia kan thil phut kan thlen theih nan Chief Minister Chamling hmuh thuai ka tum a, Scheduled Tribes (ST) status ngiatna chu state sorkar nen kan thawh ho chuan a kal chak zawk a rinawm," tiin Gurung chuan a sawi.
GTA hotu Gurung chuan tribal status chu India rampuma Gorkha te tan a nih tur thu a sawi bawk.
An thil phut chu sorkar laipuiah a thlen tawh thu sawiin, Chief Minister Chamling-a'n a thawhpui chuan awmzia a neih zawk a beisei thu a sawi.
Kum 2011 chhiarpuiah Sikkim-ah hian mihring 6,10,577 an awm a, kum 2014 khan mi 6,32,820 vel awma chhut a ni a, an zinga mi nuai nga vel hi Gorkha mi nia sawi a ni.
Gorkha National Liberation Front chuan kum 1986 aṭangin kum 1988 thleng khan West Bengal hmar lam, Darjeeling bialah Gorkhaland state hran siam an phut a, an chawlhsan hnuah kum 2007 aṭangin state hran siam phutna hi Gorkha Janmukti Morcha chuan a tharthawh leh a ni.