Kuki JAC-in kawngpui danchah an tintuah

January 28-a Assam Rifle te'n Kuki mi pahnih an kahhlum vanga an lungawi lohna lantir nan Kuki pawl hrang hrang inzawmkhawm, Joint Action Committee (JAC) chuan kawngpui danchah an tintuah.

Manipur-a Kuki activist te chuan state sorkar chu January 28-a mi pahnih thihna thithleng chhuichianna report tlangzarh duh lohah an puh a, hei vang hian an lungawi lohna lantir nan Nilaini, January 28 aṭangin ni nga chhung kawngpui danchah an tum.

January 28 khan Kuki mi panga chu Imphal West district, Kadangband-ah jeep-a an tlan laiin 8th Assam Rifles te'n an lo kap a, mi pahnih an kaphlum a, mi pathumin hliam an tuar. Mi pahnih thi zinga pakhat, Robert Hesei Kigpen chu sorkar laipui nena inkahhai thutlung nei mek KNF hel a ni.

Kuki activist te chuan Assam Rifle te thiltih chu helte leh sorkar sipaite inkahna a ni lo an ti a, state sorkar chu ni 15 chhunga magisterial inquiry nei tura phutin, mahse state sorkarin inquiry report tun thlenga a tihchhuah loh avangin bandh huaihawt an tum a, mahse nimin aṭang zirlaite'n exam an ṭan avangin Nilaini aṭangin kawngpui danchah an tum ta zawk a ni.

Kawngpui danchah tur hi Imphal luhna kawngpui, National Highway pahnih a ni a, ei leh barah harsatna a thlen rin a ni.