Sikkim-a chi peng 12-te tan ST status dil

Sikkim Rajya Sabha Member of Parliament, DT Lepcha chuan an state chhunga chi peng hrang hrang 12, Schedule Tribe (ST) nihna pek ni ve lote tan sorkar laipui hnenah ST nihna pek a dilsak.

MP Lepcha chuan Parliament-a thu a sawinaah Sikkim mipuite chu hnam hlawm lian pathum- Lepcha, Bhutia leh Nepali-ah ṭhenhran an ni tiin, 1891 census-ah chuan Nepali 63.3% awmin Bhutia 16.06% leh Lepcha 18.9% an awm bawk a ni, a ti. "Sikkim chuan kum 1975 khan India a zawm a, India danpui chuan kum 1978 khan Bhutia leh Lepcha chauh chu Sikkim-a Schedule Tribe nihna a pe a, hemi vang hian Nepali-te chuan state assembly-a seat hausak an nihna chu an hloh a ni" tiin Lepcha chuan a sawi. Nepali hnam zingah Limbu leh Tamang-te chu kum 2003 khan ST nihna pek an ni tawh tih a tarlang thung.

Sikkim MP chuan ST nihna neih a pawimawh chhan sawilangin, an state chhungah tualṭo hnam an tlem zel a, ram leilung fate a tlem zawk an nih huna an dikna chanvo humhim nan Tribal nihna pek chu a pawimawh tih a sawi. Hemi bakah hian heng chi peng 12-te hi tribal nihna pek an nih hun chuan Sikkim chu hmarchhak state dangte angin Tribal state an ni thei dawn a ni, a ti. MP Lepcha chuan mihring nuai 4.5 vel chenna Sikkim hi state dang aṭanga pem lutte lakah humhim a ngai tih a sawi bawk.