Arunachal : 3D printing technology hmangin sorkar school sa

Arunachal Pradesh-a kang meiin a tihchhiat, Itanagar-a Government Secondary School Pachin chu thla hnih chhungin 3D printing technology hmanga sak ṭhat leh a ni. Hei hi India rama 3D printing technology hmanga sorkar sikul sak hmasa ber a ni.

Arunachal Pradesh chief minister Pema Khandu chuan an hlawhtlinna chan chu a pawimawh hle tih sawiin, zirna kaihhnawiha mamawh hrang hrang awlsam zawk leh chak zawka neih a nih theih nan 3D printing technology chu a ṭangkai dawn hle a ni, a ti. Tunlai thiamna hmang ṭangkaiin, zirna chu hmun kilkhawr zawka awmte tan leh zirna ṭha dawng lote awmna hmunah kalpui theih a inbeisei thu a sawi bawk.

3D printing hi additive manufacturing tia hriat a ni bawk a, khawla thil siam tur ruangam duan sa chu khawl thiamna hmang veka a taka siam a ni. Itanagar-a Government Secondary School Pachin, 3D printing hmanga sak hian in sakna lama 3D printing hman theih a ni tih tilang a, India rama school sak hna ti awlsam a, chak zawka hna thawh a nih theih nan hmalam hunah he thiamna hi hman ṭangkaina a la tam chhoh zel pawh a rinawm.