Tripura-a lut ru Rohingya raltlante buaipui an ngai : MEA official

Ministry of External Affairs joint secretary, Ankan Banerjee chuan Bangladesh aṭanga Tripura-a lut ru, a bikin Rohingya-te chu buaipui an ngai hle tawh tih a sawi. Tripura-ah hian kar liam ta Inrinni aṭang khan Bangladesh khua leh tui mi 29 zet man an ni tawh a ni.

Ankan Banerjee chuan Rohingya lut rute chu buaina tham an tling tih sawiin hmarchhak mai bakah India ram hmun dang, Hyderabad, Haryana leh Kashmir thlengin hmuh tur an awm tawh a ni, tiin "Ramchhung himna a tiderthawng thei a ni" a ti. Dan loa ramri kante chungchang chu thuneitu sangte nen sawi ho a ni tawh tiin, "Dan loa rawn lutte hi thawn kir leh vek duh mah ila an ram hriatchian a nih phawt loh chuan MEA-in phalna a pe thei lo a ni" a ti.

MEA joint secretary Banerjee hian dan loa rawn lutte bakah hmarchhak tana inkalpawhna ṭha zawk siam tum a nih thu a sawi bawk. Kolkata, West Bengal aṭanga Bangladesh paltlanga hmarchhak kalpawhna siam tumna chu chak zawk hma lak tum a ni tiin, ram pahnih thuneitute chuan he project kalpui a nih theih nan chinfel ngaite an chinfel thuai a beisei a ni.