Assam : Sorkar hnathawkten OPS hman leh an duh

Assam sorkar hnuaia thawktute chuan National Pension System (NPS) hman mek chu Old Pension Scheme (OPS) a thlak leh an duh a, an thil phut a hlawhtlin theih nan nawrh huaihawt an hreh lo tih an sawi.

All Assam Government NPS Employees’ Association (AAGNPSEA) chuan thuchhuah siamin, OPS hman leh duhna lian hle mah se state leh sorkar laipui hotute chuan NPS chu an kalpui lui tlat niin an sawi a, hemi a nih avang hian sorkar chu nasa zawka nawr an tum tih an tarlang. OPS hman leh an duh chhan chu pension tawhte tana a ṭhat zawk vang a ni tih an sawi bawk.

AAGNPSEA chuan,"Working class tana hamṭhatna siam lam aiin sorkar laipui chuan budget tharah a hnathawkte hlawh 4% laksak tumin a ruahman a, hei hi sumdawng liante hlawkna an zawnsak vang a ni," an ti. Assam chief minister chu sorkar laipui ruahmanna kalpui ve lo turin an ngen a, state sorkar hnuaia NPS hmangte hlawh aṭanga 4% lak heu sak ve lo turin CM an ngen a ni. Sorkarin OPS hmang tura thutlukna a siam hma chuan sorkar hnathawkte tan an bei zel dawn tih an tarlang.