Nagaland-ah swine flu natna kai hmuchhuak
Nagaland, Dimapur-ah swine flu (H1N1) natna kai hmuhchhuah a nih tih Health and Family Welfare deputy director thuchhuak chuan a tarlang.
Deputy director Tiasunep chuan February 16 khan Dimapur district hospital-ah Naga hmeichhe pakhat chu swine flu a kai tih hmuhchhuah a ni, a ti. Natna kai hmeichhia hi February 13 khan Chennai aṭanga Kolkata kaltlangin Dimapur-a haw a ni.
Tiasunep chuan natna kai hmeichhia hian khawsik, luak leh taksa chaua a awm hnuah February 14 khan Dimapur district hospital-ah a inentir tih a sawi a, doctor te chuan a nat danah an rinhlelh avangin midang tlawhpawh theih lohin an dah hrang nghal a, February 15 khan Assam, Dibrugarh-a test turin a blood sample an thawn a, Thawhṭanni khan swine flu a vei tih hmuhchhuah a ni, a ti.
Health and Family Welfare Deputy director Tiasunep chuan swine flu natna kai hmeichhia hi a ṭhat chhoh zel chuan ni hnih emaw ni thum hnuah damdawi-in aṭanga a chhuah theih a beisei thu a sawi a, natna a darh zau loh nan invenna pawh khauh taka kalpui a nih thu leh mipuite pawh chiai lo turin a ngen bawk.
"Damlo hian a natna hi state pawn aṭanga a kai a ni a, lo chiai vak a ngai lo a ni," a ti.