Arunachal zirlaite'n DBT cheme kaltlangin scho an la dawn

Arunachal Pradesh tlawha zin Union Tribal Affairs Minister Jual Oram chuan tribal zirlaite post matric scholarship chu Direct Benefit Transfer (DBT) scheme kaltlangin zirlaite bank account-ah direct-a pek an nih tur thu a sawi.

State Social Justice, Empowerment and Tribal Affairs department te'n Thawhlehnia Itangar-a review meeting an neihah Union Minister Oram chuan he thu hi a sawi a, zirlaite chuan Aadhar nena thlunzawm bank account an nei vek tur a ni, a ti.

Oram chuan health leh education lama infrastructure hmasawn nan state sorkar chu zirlaite skill development scheme ngaihpawimawhsak turin a hrilh.

Skill development scheme pawimawhna sawiin Oram chuan tribal lehkhathiam mahnia eizawnna dapte chu National Scheduled Tribe Finance and Development Corporation (NSTFDC)-in ṭanpuina a rua­hmante chu umzui ṭhin turin a ngen bawk.

Union Tribal Affairs Minister Oram chuan Tawang district, Lumla leh East Kameng district, Bana-a EMRS school pahnih chu school bus emaw ambulance pek an nih tur thu a sawi bawk.

Meeting-ah hian Aruna­chal Social Justice, Empowerment and Tribal Affairs department director Taw Tebin chuan Union Tribal Affairs Ministry hnuaia scheme leh project hrang hrang an kalpui mekte power point presentation hmangin a tarlang.

State Women and Child Welfare Minister Wanglin Lowangdong chuan Union Minister Oram-a thu sawi chu thlamuanthlak a tih thu sawiin, India danpui Article 275(1) tlawhchhana sorkar laipuiin state sorkar hnena ṭanpuina sum a pek chu tihpunsak tura a ngen bakah project kalpuina atana Tribal Affairs Ministry-a rawtna an thlen tawhte chu pawmpui thuai turin a ngen bawk.

Review meeting-ah hian state chief secretary Ramesh Negi, social justice & empowerment secretary Gamli Padu leh department officer te pawh an tel.

Oram hian Thawhlehni vek khan Arunachal Governor Lt Gen Nirbhay Sharma (Retd) nen Raj Bhawan-ah meeting an nei nghal a, Tribal Affairs Ministry hnuaia programme hrang hrang kalpui mekte an sawi dun.

Governor chuan tribal te hamṭhatna scheme kalpui mekte chu tihlen a pawimawh thu Union Minister Oram a hrilh.