PM Modi-a'n Arunachal statehood day hmanpui dawn Modi hmain Union Minister pali-in Arunachal tlawh tawh

Prime Minister Narendra Modi chuan vawiin, February 20 hian Arunachal Pradesh Statehood Day vawi 29-na a hmanpui dawn.

Modi hi India ram Prime Minister zinga Arunachal Pradesh Statehood Day lawmna hmanpui hmasa ber a ni ang.

A ram nia Arunachal Pradesh chhaltu China chuan Prime Minister Modi hoa statehood day lawmna hi a helh hle rin a ni. Nikum November thlaa President Pranab Mukherjee-a'n Arunachal a tlawh ṭumin China hian India a vau nghal a, India chu ramri inchuh thubuai ti­khirhtu ni lo tur leh hetianga hma la lo turin a lo vau tawh a ni.

Kum 2009 khan Prime Minister hlui Manmohan Singh chuan Arunachal Pradesh a lo tlawh tawh bawk a, hemi ṭum pawh hian China chuan a lawm loh thu a lo auchhuahpui leh tawh bawk.

Asian Development Bank (ADB)-in Arunachal Pradesh-a water project kalpuina atana fund a pek pawh a lo dodal tawh a, India chu project kaltlangpui lo turin a lo ngen tawh bawk.

Vawiina statehood day lawmna hi Itanagar-a IG Park-ah hman a ni ang a, Prime Minister Modi chuan thuchah a sawi ang.

Modi hian statehood day lawmnaa thu a sawi zawhah Aru­nachal, Naharlagun rel station leh Delhi inkara Rajdhani Express rel service a vai liam nghal ang.

Nikum April thlaa Naharlagun rel station thleng rel tlantir chhin a nih hnuah Arunachal hi India ram Railway Map-ah chuantir a ni.

Prime Minister hian Delhi aṭanga Itanagar thleng rel service tir an tum thu a puan rin a ni bawk.

Rel service tur vai liam bakah Modi hian Trans Arunachal Pradesh 132 Kv Transmission line siamna tur lung a phum bawk ang a, Itanagar Water Supply Scheme a hawng bawk ang.

Modi hian Arunachal Pradesh-ah darkar hnih chauh hun a hmang dawn a, mahse state sorkar chuan Modi hian Arunachal tan project lian tham a puan ngei a beisei a ni.

Prime Minister hmalakna hnuai­a Union Minister te'n hmar­chhak tour an tlawh tawhah Aru­nachal Pradesh hi Union Minister pali-in an tlawh tawh a, chungte chu- Union Agriculture Minister Radha Mohan Singh, Water Resources Minister Uma Bharti, Civil Aviation Minister Ashok Gajapathi Raju leh Tribal Affairs Minister Jual Oram te an ni.