Tuilian vanga harsatna sorkar laipuiin ngaihthah: CM Gogoi

Assam Chief Minister Tarun Gogoi chuan tuilian avanga Assam harsatna ngaihthahah sorkar laipui a puh.

"Assam sorkarin thla li kalta, nikum October thla khan sorkar laipuiah ṭanpui dilna, memorandum a thehlut a, mahse sorkar laipui chuan Assam-a tui lenna hmun enfiah turin tun thlaah chauh inter-ministerial team a rawn tir a ni. Sorkar laipui hian Assam harsatna hi a ngai pawimawh lo hle a ni," a ti.

Tuilianin harsatna leh chhiat­na a thlente siamṭhat leh nan leh a tuartute chhawmdawl nan Assam sorkar chuan nikum October khan sorkar laipuiah ṭan­puina sum vaibelchhe 9,370 a dil a ni.

"Jammu & Kashmir-a tui a len ṭumin sorkar laipui chuan rang lutukin ṭanpuina a pe nghal a, nikum tuilianah Assam-in harsatna lian tak a tawk a, mahse cheng khat pawh sorkar laipui aṭangin ṭanpuina kan la hmu lo," tiin Gogoi chuan a sawi.

Inter-ministerial team chuan a vawi khatna atan February 3 khan tuilian thlenna Goal­para, Barpeta leh Kamrup district an tlawh a, February 13 khan Dhemaji, Lakhimpur leh district dangte an tlawh leh a ni.

Gogoi chuan sorkar laipui­ah utilisation certificate theh­lut mah se sorkar laipuiin department hrang hrangte sum dawn tur a la pekchhuah loh thu a sawi bawk. "Kum 2013-14 chhunga schemes hrang hrang kan kalpuiah vaibelchhe 5,236.98 hu UC kan thehlut a, sorkar laipuiin vaibelchhe 7,161.57 sum min ruahmansak mahse kum 2014-15-ah cheng vaibelchhe 2,591.62 chauh min lo pe a ni," a ti.

Gogoi chuan tuilian ṭanpuina atan nikum October 1 khan Union Home Minister Rajnath Singh hnenah memorandum a thehlut a, mahse sorkar laipui chuan Assam sorkar chu kalphung pangngai taka dilna thehlut turin a hriattir hnuah October 22 khan an thehlut ṭha leh a ni.