Assam-a BJP hotu Prodyut a bang

Assam mi BJP national executive member Prodyut Bora chuan Prime Minister Narendra Modi leh BJP president Amit Shah kal danah a lungawi loh thu sawiin, Nilaini khan party a chhuahsan.

BJP IT cell convenor hna pawh lo chelh tawh Prodyut chuan Modi chu sawisel zuiin party chhunga democracy kal­phung tichhetuah a puh a, BJP president Amit Shah chu a mimal thil ngaipawimawh zawk leh mahni inchhuang lutuk tia a sawi bakah Shah chu thuneihna pumhlum neih tumah a puh bawk.

Prodyut-a'n BJP hotute chung­chang a sawi chu Assam BJP president Siddhartha Bhattacharyya chuan chhanglet nghalin Prodyut-a thusawi chu finfiahna awm lo leh belhchian dawl lo a ni, a ti a, Prodyut-a chu mipuite thleng phak hmalakna engmah nei loah a puh.

Assam BJP president chuan Prodyut-a puhna thudik ni chuan tun hnaia Assam-a municipal board leh town committee in­thlanah BJP a chetṭhat loh tur thu a sawi. Municipal board leh town committee 74-a inthlanna neihah BJP hian bial board leh committee 39-ah hnehna a chang.