Modi-a'n Arunachal-ah hmasawnna tam zawk thlentir a tiam

Prime Minister Narendra Modi chuan nimin khan Arunachal Pradesh Statehood Day vawi 29-na lawmna inkhawm a hmanpui a, Railway Minister Suresh Prabhakar Prabhu-a'n a ṭawiawm.

Modi chuan Arunachal-in kum 28 kalta chhunga hmasawnna a hmuh aia tam hmasawnna kum nga chhunga thlentir a tiam.

"Statehood day lawmna hmanpui tura ka lo kal thei hi ka lawm a, Governor leh Chief Minister-in lo kal turin min sawm a, he state-in min hipna avangin lo kal lo thei lo ka ni," a ti.

Prime Minister chuan hmarchhak bial harsatna lian ber pakhat chu rel, lirthei kawngpui leh thlawhtheihna hmanga inkalpawhna a ni, a ti a, Arunachal-a rel lut hian state tourism a tihchangtlun ngei a beisei thu a sawi bawk.

Statehood day lawmna hman zawhah Arunachal, Naharlagun leh Delhi inkara Air Conditioned (AC) rel service tur a vai liam bawk.

Naharlagun rel station hi Arunachal khawpui, Itanagar aṭangin kilometre 10-a hla a ni a, he lai hmun aṭang hian Delhi rel station hi kilometre 2100-a thui niin, darkar 38 chhunga thlen theih beisei a ni. Naharlagun leh Delhi inkara rel service bakah hian Naharlagun leh Guwahati inkara 'intercity express' rel service tur chu Modi hian a vai liam bawk.

Prime Minister chuan, "Rel hmanga inthlunzawmna chu ram hmasawnna innghahna a ni a, Railway chu Arunachal chakna pakhat a la ni dawn a ni. Rel lut hian Arunachal-ah khualzin tam zawk a hip luh ka ring a, India ram mipuite'n he state leilung mawina hi an hmu ve thei dawn a ni," a ti.

Nimin vek khan Prime Minister Modi hian Itanagar water supply scheme a hawn bakah 132 KV transmission line siamna tur lung a phum bawk.

Arunachal mipuite chu hydropower siamchhuah kawnga sorkar thawhpui tur leh thlawp turin Modi chuan a ngen a, hydropower chu Arunachal Pradesh hmasawnna a nih tur thu leh India ram tihenna tur a ni tih a sawi bawk.

Hydropower siamchhuahna chu Nepal leh Bhutan-in an ram economy dinhmun siamṭhatna atana an hman thu sawiin Modi chuan, India ramah pawh Himachal Pradesh chu hydropower siamchhuah kawnga India ram tana malsawmna a nih dan a tarlang bawk.

Arunachal Pradesh-ah India ram pum hman khawp power a siamchhuah theih thu sawiin, hydropower siamnain a nghawng mipuite chu an phu tawk zângnadawmna pek an nih tur thu a sawi.

Modi chuan hmarchhak bial chu India rama 'organic farming' hmunpui a nih theih thu sawiin, sorkar laipuiin hmarchhakah agriculture college paruk hawnbelh a tum thu a sawi bawk a, 'Make in Northeast' chu Make in India programme chhung a mi a ni, a ti.

Hmarchhak bial mipuite hmasawnna atana sum a harsat loh tur thu sawiin Prime Minister Modi chuan mipuite chu rin ngama awm tur leh hmasawnna sum cheng khat pawh hmasawnna atana hman a ni em tih finfiah peih turin a ngen. Sorkar laipuiin Hmarchhak biala hmasawnna project kalpuina atana sum a pekchhuah te dik taka hman a ni em tih enpui turin Union Ministers leh official te'n tun hnaiah hmarchhak state vawi eng maw zat an tlawh thu a sawi bawk.

Retheihna a umbo theih loh tia mite'n an sawi chu Modi chuan sawifiahin, rua­hman­-na (roadmap) duan a ngai a, chu mi puitlin nan chuan a taka hnathawh a ṭul a ni, a ti.