Gogoi-a'n naturonomic kalpui duh

Assam Chief Minister Tarun Gogoi chuan ram economy hmasawnna leh leilung hausakna hmanral dan chu inrual­khai taka kalpui a duh thu sawiin, leilung leh economy chu thlunzawm thiam a pawimawh thu leh hemi atan hian 'naturonomic' kalpui a duh thu a sawi.

Ningani khan Jorhat-ah Assam International Trade and Industrial Fair (AITIF) hawngin Gogoi chuan Assam a intodelh theih nan ṭhalaite chu sumdawnna atan thil siamchhuah lam uar turin a ngen.

Assam Chief Minister chuan ei leh bara hmasawnna rintlak a awm theih nan leilung hausakna chu inrenchem taka hman thiam a pawimawh thu a sawi bawk.

Industry hmasawnna chu environment hmasawnna nen a rualin an kalkawp tur a ni, tiin Gogoi chuan a sawi bawk a, industry lama Assam hmasawn nan thingpui, mau, chaw lam chi sawngbawlna leh agriculture kaihhnawih industry te chu sorkarin a ngaipawimawh a ni, a ti.

AITIF hawnna in­khawmah hian Assam Chief Secretary Jitesh Khos­la pawhin thu sawiin, sumdawnna lian zawka kalpuina atan hmarchhak state te leh ASEAN ramte'n thawh hona ṭha an neih a pawimawh thu a sawi.