Nagaland edn deptt sum chingpen SIT-in chhui dawn

Nagaland sorkar chuan State School Education department-in cheng vaibelchhe 12.79 a tih­chingpen chhui turin Directorate of Vigilance and Anti-Corruption Police hnuaiah Special In­ves­tigation Team (SIT) a din.

Vigilance Commission Nagaland-in thuchhuah a siamah Chief Secretary leh Vigilance Commissioner chuan sum chingpen chhui tur­in SIT a din tih a tarlang a, education department-a official leh mi ṭhen­-khat chu sum chingpenah hian an inhnamhnawih tiin a tarlang bawk.

SIT chuan Nagaland district 11 tlawhin education department sum vaibelchhe 12.79-a an bungraw leite leh naupang rualbanlo awm zat dik tak an enfiah ang.

SIT hi thla li chhunga chhuichianna peihfel hman tur leh Vigilance Commissioner hnena report thehlut tura beisei a ni.

Education department hnuai­a pianphunga rualbanlote tana Inclusive Education for the Disabled at Secondary Stage (IEDSS) programme kalpuina sum vaibelchhe 12.79 chu kum 2011-12 leh 2012-13 chhungin education department official te'n an ti­chingpen tiin Vigilance Commission thuchhuak chuan a tarlang.