Sorkar laipuiin NE urban scheme ennawn dawn
Union Urban Development Ministry chuan hmarchhak biala urban schemes hrang hrang a kalpui mekte chu ennawn a tum thu a tarlang.
He thu hi Union Urban Development and Housing Minister M Venkaiah Naidu chuan Minister of State for Home Affairs Kiren Rijiju hnenah a hrilh a ni.
Rijiju chuan hmarchhak biala urban schemes kalpui mek chungchangah Nilaini khan Union Urban Development Minister Naidu a hmu a, hmarchhak tana Union Urban Ministry hmachhawp leh hmalakna hrang hrang an sawi dun.
Hmarchhak biala hmasawnna atana Union Minister pahnihte chuan Urban Ministry hnuaia hmarchhak biala scheme hrang hrang kalpuite chu chak zawka kalpui an duh thu an sawi bakah smart city dinna atana hmalak dan tur te, khawpui 500 tihchangtlun dan turte leh khawpuia mirethei te tana skill development kalpui dan tur te an sawi dun bawk.
Union Minister of State for Home Rijiju chuan Naidu chu hmarchhak biala smart city siam tur leh programme dangte chu ngaipawimawh turin a ngen.
Tun hnai khan Meghalaya Chief Minister Mukul Sangma pawhin Union Minister Naidu hi Shillong khawpuia fur tuihawk paihna siam dan tur chungchang a lo sawipui tawh bawk.
Mukul chuan Meghalaya housing scheme kalpuina atan special fund a dil bawk. Naidu chuan theihtawp chhuaha ṭanpui a inhuam thu leh sorkar laipuiin scheme thar, ‘Housing for All’ tlangzarh thuai a tum thu a lo hrilh.