Assam sorkar hnenah Hmar mi 3 thihdan report theh luh hun hriattir

Gauhati High Court chuan Hmar ṭhalai pathum thihna chhuichianna report chu a rang lama thehlut turin Assam sorkar a hriattir. Hmar ṭhalai pathumte hi police lamin helpawl nena an inkahnaa thi niin sawi mah se Hmar mipuite erawhin police kut tuara thi ngei niin an sawi thung.

Justice Kalyan Rai Surana leh Justice Soumitra Saikia te awmna division bench chuan July 17-a thil thleng chungchang chhuichhianna report hi August 2, Zirtawpnia hearing an neih leh hma ngeia thehlut turin Assam sorkar chu thu a pe a ni. Hei bakah hian ruang pathumte chu August 2 thleng dah ṭha turin a hriattir bawk. Court chuan thihna thleng chungchanga chemical analysis report pawh hearing neih leh hmain thehlut hman turin sorkar chu a hriattir bawk.

Hmar ṭhalai pathumte thihna chhuichianna neih mek chu Directorate of Forensic Science (DFS), Assam-ah report ṭhenkhat tih fel a la nih loh avangin an thih chhan dik tak hriat theih a la ni lo tih HC chuan a tarlang. Court chuan Assam sorkar chu heng report peih fel thuai tur leh an thih chhan dik tak tichiang thuai turin a thu a pe bawk.

Lallungawi Hmar (21), Lalbiekkung Hmar (33) leh K Joshua Lalrinsang (35) te chu July 17 khan Bhuban Hills, Cachar district-a inkahnaa thi angin Assam police-te chuan an tarlang a, an thih danah hian rinhlelh tur thil a awm avangin an chhungte chuan July 19 khan thil thleng chhuichian phutin FIR an thehlut a ni. Hemi hnu hian writ petition thehluh leh niin ṭhalai thite chu July 16-ah man niin a tukah police kutah an thi nia tarlan a ni. He thihna thleng hi Hmar pawl hrang hrang chuan an dem a, lungawi lohna lantirin kawng an zawh a ni.