Manipur MP-in state tan chhawmdawlna a dil

Manipur Rajya Sabha Member of Parliament, Leishemba Sanajaoba chuan Thawhlehni khan Parliament-ah thu sawiin an state buaina vanga tuarte tan chhawmdawlna sum dah hran a duh thu a sawi.

MP Sanajaoba chuan state chhung boruak sang tak chu a tlahniam hret hret niin a sawi a, nunphung pangngaia let leh thuai an inbeisei tih a sawi. Sorkar laipui leh state sorkar hruaitute chu remna an neih theih nana chawl loa an thawh reng avangin lawmthu a hrilh. Manipur buaina a reh theih nan sorkar laipui chuan tun ai hian ṭan la leh zual se a duh tih a tarlang bawk.

Sanajaoba chuan,"Mipuite hian an tuar rei tawh a, buaina laka hahdam an mamawh ve tawh a, hei vang hian sorkar laipui hnenah chhawmdawlna sum ka dil sak duh a ni" a ti. An state chhunga hnam tinte chu inngeih taka an awm theih nan remna tluan tling an mamawh a, sorkar laipui chuan hemi tur hian hma la se a duh thu a sawi. Hun kal tawha Manipur state boruak ralmuang leh ropui tak ang chu neih let leh ngei an duh tih a sawi.

Congress MP, Outer Manipur bial aṭanga thlan tlin thar Alfred Kan-ngam Shangshakwoshi Arthur chuan Parliament a thu a sawi vawi khatnaah Manipur ngaihthah a nih vangin sorkar laipui a dem ve thung. Tualchhung buaina leh tuilian vangin harsatna nasa tak tawk mah se ṭanpuina an dawng ṭha tawk lo niin an sawi. An buaina ching fel turin sorkar leh prime minister Narendra Modi chu mimal takin an inrawlh a ngai a ni, a ti.