Sikkim : Japan mithiamten khuarel chhiatna nghawng an zirchiang

Sikkim-a tun hnaia khuarel chhiatna thlengin chhiatna a thlente zirchiang tur leh, a inven dan turte sawi ho turin hetiang lama mithiam, Japan mite chuan Sikkim an tlawh.

Sikkim-a kal zinga an hotu, Kuwano Takeshi leh Namrata Thapa, Relief Commissioner te chu Land Revenue and Disaster Management Department Conference Hall-ah inkawmin, chhiatna thleng thei laka inpuahchah dan turte an sawi ho a ni. State chhunga harsatna an tawh lian ber pakhat, leimin vanga chhiatna thleng chungchangte pawh sawi ho a ni. Japanese team-te chuan leimin vanga mipui thiar chhuah ngai ṭhin chu sawilangin an thiamna hmanga puih an tiam a, hei bakah hian Sikkim chhanchhuaktu pawlte chu training pek an tum bawk.

Japanese team-a mi pathum- Takashi Yuashi, Miho Akoguchi leh Sasaki Yuka te chuan ni hnih chhungin tun hnaia chhiatna thlenna hmunte an tlawh kual bawk a ni. Majuwa leh Pathing-a leimina hmun an tlawh a, hemi bakah hian chhiatna thlenna hmun hrang hrang an tlawh bawk.