Nagaland : Vawiin aṭangin hman-khat-daih-sarang hman khap

Nagaland chhungah vawiin aṭangin hman-khat-daih-sarang ṭhenkhat chu hman phal a ni dawn ta lo. Nagaland chhunga plastics vanga buaina a tam zel loh nan he thil hi kalpui tum a nih bakah environment humhim tumna kawnga hmalakna a ni bawk.

Nagaland state pumah hian vawiin aṭangin single-use plastic carry bags leh single-use plastic bottles chu hman khap a ni dawn a, plastic bag hi eng microns pawh ni se a zavaiin hman khap a ni a, plastic bottles erawh tui leh soft drinks bur atana hman litre 1 hnuai lam chin khap a ni thung. Thupek hi zirna-in, pisa, hotel, dawr, biak-in leh industry-ahte zawm tura hriattir niin thupek zawm lote chu hrem an ni ang. Dan bawhchhiate chu a ṭum khatnaah Rs 10,000 chawitir niin a ṭum hnihnaah Rs 20,000 niin permit cancel sak thlengin hrem theih an ni dawn a ni.

Hman-khat-daih-sarang khapna thupek kenkawh hna hi District Task Force (DTF) te kutah dah a ni dawn a, district hrang hrangah din a ni tawh. DTF hian sarang lo khawlkhawm, pe chhuak, zuar leh hmangte an endik ṭhin dawn a ni. DTF hi thla thum dana inhmukhawm ṭhin tura tih niin he hunah hian dan zawm a nih dan chungchang sawi ho a nih bakah Action Taken Reports (ATR) chu sorkar hnenah an thehlut ṭhin bawk ang.