Prime Minister-in AP a tlawh vangin China a lungawi lo

Prime Minister Narendra Modi chuan kar kalta Zirtawpni khan Arunachal Pradesh tlawhin statehood day lawmna a hmanpui. Hei hi China chuan rang takin a sawisel zui nghal.

China Vice Foreign Minister Liu Zehnemin chuan Inrinni khan China rama India ambassador, Ashok K.Kantho chu koin, PM Modi-a'n ram inchuh mek, Aruna­chal a tlawh chung­changah China chu a lawm lo hle tih a hrilh. India rama China embassy pawhin Zirtawpni zan khan an lungawi loh thu thuneitute hnenah a lo thlen tawh bawk.

China foreign ministry thupuangtu, Hua Chunyhing chuan thuchhuah siamin, "China sorkar chuan Arunachal Pradesh tia sawi hi a la pawm ngai lo," a ti.

Ambassador Kantha nena meeting an neihah, Vice Foreign Minsiter Liu chuan India thiltih dan chu China-in a ram chunga thu a neihna leh a duhdante zahsak lohna a ni tiin a sawi. Modi-a'n AP a tlawh chuan ramri chung­changa ram pahnih­te inhriatthiam lohna a ti hluar zawk a, hemi kawnga inremna siam tura thuthlung an lo siam tawh palzutna a ni, a ti.

India nena inlaichinna ṭha siam chu China chuan a dah pawimawh hle a ni tih Liu chuan a sawi a, India pawh hei hi dah pawimawh tura a duh thu a sawi bawk.

PM Modi hian Arunachal Pradesh Statehood Day lawmna a hmanpui bakah, Naharlagun-New Delhi Express a vai liam bawk. PM hi Union Railway Minister Suresh Prabhu, Minister of State for Railways Manoj Sinha leh Minister of State for Home Kiren Rijiju-a'n an ṭawimawm.