Nagaland-ah swine flu vei hmuhbelh leh

Nagaland-ah ramchhunga hri leng mek, swine flu (H1N1) hri vei pahnihna chu kar kalta Zirtawpni khan hmuh belh leh a ni.

Director of Medical Health & Family Welfare Dr Sukhato A.Sema chuan swine flu vei an hmuh thar hi mipa, kum 27 mi a nih thu sawiin, Delhi-ah kar hnih vel a awm hnuin Zirtawpni khan Dimapur-ah a haw a, a awmdanah insawiselna a neih avang­in thisen sample lain Dibrugarh-ah thawn a ni a, tlai lamah a result hi chhuakin H1N1 a vei tih finfiah a ni ta a ni, a ti.

February 18 khan Naga hmeichhe pakhat, Chennai aṭanga haw chu H1N1 a vei tih finfiah a lo ni tawh bawk a, heng damlo pa­hnihte hi Dimapur district hospital-a isolation ward-ah enkawl an ni.

Health & Family Welfare Commissioner and secretary Sentiyanger chuan state chhung district tina Chief Medical Office leh Medical Superintendent-te chu H1N1 flu chungchangah video conferencing a neihpui dawn a, swine flu leng mek do let dan tur an sawi ho ang.

Hmarchhak biala state dangte pawhin swine flu leng laka invenna turin hma an la nghal a, Manpur-ah chuan district pakua-ah surveillance cell hawn a ni a, Assam pawhin state chhunga hospital pathum­ah swine flu veite enkawlna tur hmun bik a ruahman tawh bawk. Tripura Health and Family Welfare Minister Badal Choudhury chuan Agartala medical college-ah special medical ward siam a ni, a ti.