Manipur-a exam centre-ah buaina a chhuak

Kar kalta Inrinni khan Manipur-a HSSLC exam centre pakhatah buaina a chhuak a, exam official-te motor pariat tihchhiat a ni.

Lilong Haoreibi College exam centre-ah Council of Higher Secondary Education flying scout team chuan an chairman, Thoubal district DC hoin surprise check an nei a, exam-naa dik lo taka thilti zirlaite chu an hnawtchhuak. Hnawhchhuah an nih hnu hian zirlai chhungte chu college gate-ah hian pungkhawmin, exam-na hmun aṭanga hnawhchhuah an nih chu an hmalam hun thlengin a nghawng thei dawn a ni tiin ngaihtuah ṭha leh turin thuneitute an ngen.

Mahse flying scout team hian an thutlukna siam chu thlak an tum lo tih an sawi a, hemi hnu hian pungkhawmte hian college campus hi lunga tawngin class room ṭhenkhat tukverh darthlalangte an vawm chhia a ni. Hei bakah han college campus chhunga official-te motor an bei zui bawk a, motor pariat an tichhia.

Hetihlai hian Lilong bial HSLC leh HSSLC exam felfai a awm theihna tura hma la tu, committee on quality education chuan exam centre-a buaina chhuak chu pawi an tih thu an sawi a, hemi rual hian buaina chhuah chhanah council chairman an puh. Committee chuan chairman leh a team-te chuan zirlai an hnawhchhuahte chu thil dik lo an ti ngei tih finfiahna an nei lo an ti a, chairman chu bang tura an phut thu an sawi bawk.