Rs vbch 4 man damdawi thi chungchang chhui dawn

Meghalaya sorkar chuan Health Department godown-a damdawi thi tawh, cheng vaibe­lchhe 4 man tihchhiat nia sawi chungchang chu chhui chiang turin committee pahnih a din.

State sorkarin committee a din pahnih zinga pakhat, fact finding committee (FFC) hi Secretary of Health-in a ho ang a, committee pakhat zawk, damdawi lei chungchang chhui chiang tur chu Additional Chief Secretary in-charge Health in a ho thung ang.

Health Minister AL Hek chuan Health department official-te meeting a neihpui hnua chanchin thar lakhawmtute a kawm­naah, sorkar godown-a damdawi thi tam tham tak a awm chung­chang chhui a nih tur thu a sawi. Committee-te hian thla khat chhungin sorkar­ah report an thehlut ang.

Hek chuan FFC member pali-te'n National Health Rural Mission (NRHM) fund aṭanga damdawi expired lei tihchhiat a nih dan hi an chhui dawn tih a sawi. NHRM fund aṭang hian kum 2010-2011 leh 2011-2012 khan cheng vaibelchhe 4.25 man damdawi lei a nih thu a sawi bawk.