Arunachal Pradesh CM-in Special package a dil

Arunachal Pradesh Chief Minister Nabam Tuki chuan sorkar laipui hnenah ramri bial tihhmasawnna tura special package pe turin a ngen.

Prime Minister Narendra Modi hnena memorandum a thehluhah, Tuki chuan an state-a air connectivity ti ṭha tura ngenin, Hollongi-a Greenfield Airport pawh siamfel thuai turin a ngen bawk.

AP-a communication network siamṭhat a ngaih thu te, state mipuite tana tui thianghlim in tur pekna tur te, hydropower lama an theihna zawn chhuah te, state chhunga smart city pathum siam leh, regional film and television institute siam tura ngenna-te CM hian a ziak tel.

Kar kalta Zirtawpnia statehood day an lawmnaah, CM Tuki hian sorkar laipui chu state tana inhawng zau zawk tura ngenin, an state tana sorkar laipuiin sum a sente chu investment anga ngai turin a lo ngen tawh bawk. Central-in state tana hmasawnna tur ruahmanna hrang hrang a siamte chu lawmawm a tih thu sawiin, Tuki chuan 'Arunachal Vision-2030' an siam tura pui turin PM a sawm nghal bawk.