Assam-ah AFSPA thla ruk dang pawtsei
Sorkar laipui chuan Assam-a hman mek, sipai hnena thuneihna sang zawk pekna, Armed Forces (Special Powers) Act, 1958 (AFSPA) chu thla ruk dang a pawtsei.
Official thuchhuahin a tarlan danin, helpawlten security force-te an beih fo avang leh, Assam state hmun hrang hrangah dan loa lakluh silai leh ralthuam dangte man a nih fo avangin Assam hi 'disturbed area' ah puan a ni a, kum 1990 November thla aṭang khan ASFPA hman ṭan a ni tawh a ni. He dan hmang hian sipaite chu beihpui thlakna kawngah thuneihna sang zawk pek niin, hriattirna pe lawk kher loin mi dap leh man theihna pawh an nei.
ASFPA hmang hian sipaite chu civil mite chungah an inluling fo nia sawiin sawisel a hlawh a, dan sakei tia sawi a ni hial ṭhin. Hmarchhak state-a Assam, Nagaland, Manipur (Imphal Municipal Council Area telloin) leh Arunachal Pradesh-a Changlang, Longding leh Tirap district-ahte he dan hi hman mek a ni.
Civil society group leh activist-ten sawisel foin, he dan hi hlip turin phut mah se, sorkar laipui chuan August 28 aṭangin thla ruk dang Assam-a hman turin a pawtsei leh ta a ni.