China lungawi lohna hi thil tul lo a ni: Rijiju

Union Minister of State for Home Affairs Kiren Rijiju chuan Prime Minister Narendra Modi-a'n tun hnaia Arunachal Pradesh a tlawh avanga China lungawi lohna chu thil ṭul lo a ni, a ti a, Prime Minister chuan a tih­tur dik tak a ti a ni, a ti.

"China lungawi lohna hi thil ṭul lo a ni a, Arunachal chungchang hi an sawichhuak leh ṭhin a ni. Prime Minister-in a ramchhung Arunachal a tlawh hi a tihtur dik tak a ni a, hei hi dodal ngai lo a ni," a ti.

"Arunachal Pradesh dinhmun hi sawi buai theih a ni lo a, Prime Minister chuan zalen takin India rama state-te a tlawh thiang a ni. Arunachal ramri kilometre tlemte bial chhung­ah ram inchuh thubuai erawh a awm chumi chinfel nan chuan inbiakna kalpui mek a ni," tiin Rijiju chuan a sawi bawk.

Prime Minister Modi-a'n February 20-a Arunachal Pradesh statehood day hmanpui chu China chuan sawisel zui nghalin, India chu ramri thubuai chinfelna atana ram pahnihte inbiakna tichhetu ni lo tura a beisei thu a tarlang.