Central Armed Police Force post ruakah NE mi 11% la dawn

Union Home Ministry chuan Central Armed Police Force hrang hranga constable post ruak 62,390 a hnawhkhah turah 11% hmar­chhak mite'n an hnawh­khah tur thu a tarlang a, Jammu and Kashmir mite tan 3% a dahsak bawk.

Armed Police Force laknaah hian Physical Standard Test (PST) leh Physical Efficiency Test (PET) neih hmasak a ni ang a, hemi hnu hian written test neih a ni leh ang.

Written test-ah hian Hindi, English leh tualchhung mite ṭawng chi 15 hman a ni ang a, hmarchhak mite tualchhung ṭawng hman turah Bengali, Assamese, Manipuri leh Mizo ṭawng te pawh a tel.

Post ruak 62,390-ah hian hmarchhak mite'n post 6,583 an chang dawn a ni.

Physical Standard Test-ah hian candidate te san zawng chu mipa centimetre 170 leh hmeichhia centimetre 157-a bi­thliah ni mah se hmarchhak mite tan chuan ngaihhnathiamna siam a ni.

Written test atan Scheduled Caste, Scheduled Tribe, Ex-serviceman leh hmei­chhiate tan fee a awm lo ang.

Outlook leh Business Standard chuan dilna hi March 2 thleng a thehluh theih tiin an tarlang a, hetihlai hian Staff Selection Commission chuan an website-a an tarlan danin February 23 kha dilna thehluh hun tawp tiin a tarlang.