ILP system kalpui ngenna Tripura-in a hnawl

Indigenous People’s Front of Tripura-in Tripura Tribal Areas Autonomus District Council huam­chhunga inner line permit (ILP) system kalpui tura a ngenna chu Tripura sorkarin a hnawl.

TTAADC area-a IPFT-in ILP system kalpui a phut chu state sorkarin a ngaihtuah dawn em tia state assembly ṭhutkhawma Congress MLA Ratan Lal Nath zawhna chu Tribal Welfare Minister Aghore Debbarma chuan chhangin ILP system kalpui tumna an neih loh thu a sawi.

Debbarma chuan, India danpui, 6th schedule hnuaia Tripura tribal te tana ADC siam a nih dan te, Tripura leilung pianhmang te, mipui awm dan te leh state politics kalphung te avangin sorkar laipui pawhin ILP system kalpui ṭul a ti lo, a ti a, sorkar laipui dan dinglaite chu tribal te humhalhna ṭha a tih thu leh ILP system kalpui tumna chu a pawm loh thu a sawi bawk.

"TTAADC area-ah ILP chu kalpui a nih chuan ADC area pawn lam a mite'n TTAADC area lut turin harsatna an nei dawn a, hei hian helai biala mipuite ei leh bar dinhmunah nghawng ṭha lo a nei dawn a ni," tiin Debbarma chuan ILP chung­changa Union Home Ministry chhana a tarlang.

Tribal Welfare Minister Debbarma chuan TTAADC area-a thil thleng hrang hrang avang­in ILP system kalpui tumna kan nei a mahse tunah chuan Bangladesh aṭanga a ruka pêmlutte danchah an ni tawh a, Tripura-a ILP system kalpui hi a ṭul lo a ni, a ti.

"TTAADC chu a ram leh mipuite humhalh nan thuneihna tam zawk pek a ni," tiin a sawi bawk.