Imphal khawpui chhunga kawngpui sial nan vbch 346

Manipur sorkar chuan Imphal khawpui chhunga ring road siam nan cheng vaibelchhe 346 a ruahman a, Greater Imphal area-a kawngpui sial hna hi ṭan tawh a ni.

Principal Secretary Command Area Development Authority Ram Muivah chuan Imphal khawpui chhunga traffic jam-ah minit 30 chuangte an tan ṭhin thu sawiin, Imphal chu kawngpuia lirthei chetsual tamna a ni tih a sawi bawk.

Manipur official record chuan state chhunga kawngpuia chetsualna 36% chu Imphal a thleng a ni, a ti a, hmarchhak biala mi nuai khat zelah kawngpui chetsualna thleng 26.92 chu Manipur-a thleng a ni, tiin a tarlang bawk.

Muivah chuan Manipur hi India rama lirthei chetsual tam lamah 17-na a ni tih a sawi bawk.

Kum 2014, January-June inkara lirthei chetsualna 220 thlengah mi 97-in nunna an chan thu official record chuan a tarlang.

Principal Secretary Muivah chuan, Imphal khawpui chhunga ring road siam tumna chu lirthei chesual tihthlemna atana hmalakna a nih thu leh traffic chep lutuk chhawk zangkhaina a ni, a ti.

Imphal ring road siam tur hi kilometre 39.48-a thui niin, metre 22-a zau a ni dawn a, kum nga chhunga peihfel hman beisei a ni.

Kawngpui siamna tur vaibelchhe 346 hi North East State Roads Investment Programme hnuaiah Asian Development Bank (ADB)-in a tum ang.