Manipur CM-in street vendor 800 chuang loan sem

Manipur chief minister N Biren Singh chuan an state chhunga district hrang hranga khawlaia thil zuar, street vendor 817 hnenah an sumdawnna an chhunzawmna turin loan a sem. 

Street vendor 368 chu Pradhan Mantri Street Vendor’s Atmanirbhar Nidhi - PM SVANidhi hnuaiah loan hi pek niin, regular licensed vendor 449 chu Pradhan Mantri Mudra Yojana (PMMY) - SHISHU hnuaiah puihna hi pek an ni. 

CM chuan Covid-19 leng mek chungchangah state dang nena khaikhin chuan an state dinhmun chu a ziaawm niin a sawi. Thla nga chhung hripui leng vanga lockdown kalpui avangin vendor-ten sum lama harsatna an tawh dan chu sorkar pawhin a hriatpui a ni,  a ti. Hei vang an sumdawnna an kalpui chhunzawm theihna turin sorkar chuan ruahmanna  hi a siam ta tih a sawi bawk. 

Vendor-te puihna atan sorkar scheme pahnih hnuaia loan pek an nih theihna tur hian bank hrang hrang an biakrawn thu CM chuan a, state chhunga vendor 20,000 vel hnenah loan hi pek tum a ni,  a ti. 

PM SVANidhi hi ministry of housing and urban affairs-in kumin June 15-a a siam kha a ni a, Covid-19 lockdown avanga harsatna tawk, street vendor-te tan capital loan pekna tur ruahman a ni. He scheme hi March 2022 thleng tur a ni a, street vendor-te chuan working capital loan Rs 10,000 thleng an la thei a, hei hi kum khat chhungin thla tin installment-in an rul ang. 

Pradhan Mantri Mudra Yojana (PMMY) - SHISHU hi kum 2015, April 8-a prime minister Narendra Modi-a'n a hawn niin, non-farm small micro enterprise tana loan pekna tur a ni. Loan hi Rs 10,000 - Rs 1,50,000 thleng pek theih a ni.