Meghalaya CM-in NGO te kawngpui dangchat lo turin ngen

Meghalaya Chief Minister Mukul Sangma chuan Jaintia Hills district-a zan lama kawngpui danchah tuma hmalatu NGO panga te chu an thil tum ṭhulh turin a ngen.

NGO panga hi - Jaintia Students’ Movement, Ri Jaintia Youth Federation, Meghalaya People’s United Front, Hynniewtrep Achik National Movement leh Hynniewtrep National Youth Front te an ni. Nikum September 24-a, East Jaintia Hills district, Mookhep hmuna mi pa­hnih kahhlum an nih vanga lungawi lohna kalzelah kawngpui danchah an tum a ni.

Chief Minister Mukul chuan thil thlen dan chu state sorkarin a chhuichian thu sawiin, mipuite hnena thudik puanzar a nih hmain report pawh enfiah mek a ni, a ti.

NGO te hian mi pahnih kahhlum an nih dan report chu mipuite hriata tlangzarh turin state sorkar chu February 25 thleng hun an pe a, sorkarin a tlangzarh lo a nih chuan Jaintia Hills bialah kawngpui danchah an tum.

National Green Tribunal chuan nikum April thla khan Meghalaya-a lungalhthei laihchhuah dan chu a him tawk lo tiin a khap a, hei vang hian Movement of Indigenous People Rights and Livelihood (MIPRL) chuan nikum September thla khan state pumah lung­awi lohna lantirin nawrh a huaihawt a ni. East Jaintia Hills district, Mookhep khuaah lungawi lohna lantirtu mipuite chuan tiam chin awm loin kawgpui an dangchat a, September 24 khan nawrh huaihawt mipuite leh police te innawrnaah police te hian silai hmetpuakin mi pahnih an kaphlum a ni.