Assam CM hlui Tarun Gogoi-an Covid-19 kai
Assam chief minister hlui leh Congress party hruaitu, Tarun Gogoi chuan nimin zing khan Covid-19 a kai tih a sawi.
Gogoi chuan a twitter-ah Thawhlehnia a sample test-naah coronavirus a kai thu hi sawiin, amah nena lo inhnaihna neite chu inkhung hrang a, in test ve nghal turin a ngen. Assam hi hmarchhak state zingah hri kai tamna ber a la ni zel a, nimin thlenga hri kai hmuh chhuah tawh hi mi 94,592 an tling tawh. Hripui thihpui hi mi 260 an awm tawh bawk. Thawhlehni khan hri kai hmuh thar 1,973 awmin, mi pariatin an thihpui a ni. Hri kai hmuh thar zingah hian MLA pahnih, Congress member Ajanta Neog leh AGP member Ramendra Narayan Kalita te pawh an tel.
Assam Additional Director General of Police (Law and Order), Gyanendra Pratap Singh chuan an state-a hri kai zingah police mi leh sa 3,394 an awm tawh tih sawiin, an zinga 13 in an thihpui tawh a, mi 2,863 chu enkawl dam an ni tawh tih a sawi. Police hri kai zingah hian Director General of Police Bhaskar Jyoti Mahanta, Inspector General of Police (Law and Order), Deputy Inspector General (Administration) leh Dhubri, Tinsukia leh Kokrajhar district-a Superintendents of Police pathum bakah Tinsukia district-a Additional Superintendent of Police-te an tel.